X sosial şəbəkəsində robotun VR eynəyini çıxarmağa çalışdığına bənzər hərəkətləri müzakirə edilir
Video Tesla-nın “avtomatlaşdırmanın gələcəyinə” həsr olunmuş tədbirində çəkilib.
Mənbə: X
7 dekabr 2025-ci ildə Mayamidə keçirilən The Future of Autonomy Visualized sərgisində Optimus robotları qonaqlara yemək və içki paylayırdı.
Viral olan videoda robot bir neçə su butulkasını yerə salır, daha sonra əllərini başına qaldırır və yıxılır. İstifadəçilər yazır: “Əgər kimin şübhəsi qalırdısa ki, Optimus operatorlar tərəfindən idarə olunur, burada açıq-aşkar görünür ki, kimsə sanki VR qarniturasını çıxarır.”
Bir şərhçi iddia edir ki, tədbirdə şəxsən iştirak edib və Tesla əməkdaşı ona robotun uzaqdan idarə olunduğunu təsdiqləyib.
2025-ci ilin oktyabrında Tesla, komandanın Optimus-u “Tron: Ares” filminin premyerasında performans üçün kunq-fu hərəkətlərinə “öyrətdiyini” göstərən video paylaşmışdı. Həmin vaxt İlon Mask robotun avtonom işlədiyini deyirdi: “Bu Sİ-dir. Operator deyil.”
Tesla Mayamidəki tədbiri “immersiv səyahət” kimi təqdim etsə də, Optimus robotlarının tam avtonom şəkildə işləyib-işləməyəcəyi barədə detalları açıqlamamışdı.
Şirkətin robotları hələ ki, kütləvi istehsala buraxılmayıb. 2025-ci ilin martında İlon Mask ilin sonuna qədər 5000 ədəd Optimus istehsal edə biləcəyini demişdi. Lakin oktyabrda The Information xəbər verdi ki, Tesla zavodda işləri dayandırıb. Mənbələrin məlumatına görə, mühəndislər hələ robotun əllərinin kifayət qədər “cəldliyini” təmin edə bilmirlər. Problem həll olunduqdan sonra Tesla cəmi 2000 ədəd robot istehsal edə bilər, lakin dəqiq tarix məlum deyil.
