OpenAI və Instacart istifadəçilərə tamamilə yeni alış-veriş təcrübəsi təqdim edir. Belə ki, artıq müştərilər ChatGPT interfeysini tərk etmədən axşam yeməyi üçün ideyalar axtara, ərzaq siyahısı hazırlaya və sifarişi tamamlayaraq ödəniş edə bilərlər. Bu yenilik iki şirkət arasında uzun müddətdir davam edən əməkdaşlığın daha dərin bir mərhələyə keçdiyini göstərir; xatırladaq ki, Instacart daha əvvəl də öz tətbiqində ChatGPT əsaslı axtarış funksiyasını işə salmışdı.
Bu addım OpenAI-ın hazırda prioritet hesab etdiyi “agent ticarəti” (agentic commerce) strategiyasının tərkib hissəsidir. Şirkət süni intellektin istifadəçi adından araşdırma aparıb alış-veriş etməsini hədəfləyir və buna oxşar inteqrasiyaları Booking.com, Canva, Spotify və Target kimi digər platformalarla da həyata keçirib. Xüsusilə bayramqabağı mövsümdə süni intellekt dəstəkli onlayn alış-verişin kəskin şəkildə artacağı proqnozlaşdırılır.
Məsələnin iqtisadi tərəfi də OpenAI üçün vacibdir. Hazırda böyük resurs xərcləri səbəbindən mənfəət əldə etməkdə çətinlik çəkən şirkət, bu cür alış-verişlərdən əldə edəcəyi “kiçik komissiya haqları” ilə gəlirlərini artırmağa ümid edir. Hərçənd, şirkətin nəhəng xərclərini qarşılamaq üçün bu modelin nə qədər effektiv olacağı hələlik sual altındadır.
Mənbə: Tech.az
