m10 elektron pulqabısı ilə tanınan ölkənin aparıcı maliyyə təşkilatı “Pasha Pay” MMC-nin 100% sahibi Kapital Bankdır. Bu barədə məlumat “Kapital Bank” ASC-nin yarımillik hesabatında verilib. Qeyd edilib ki, “Kapital Bank” 21 may 2024-cü il tarixində “Pasha Pay” MMC şirkətinə 48 milyon 704 min manat investisiya yatırıb.
Qeyd edək ki, “PASHA Holding” MMC-nin maliyyə şirkəti olan “PashaPay” MMC-nin nizamnamə kapitalı holdinqin tərkibinə keçəndən sonra ilk dəfə 2023-cü ilin oktyabr ayında artırılıb. Belə ki, şirkətin nizamnamə kapitalı 18 milyon manat artırılaraq 22 min manatdan 18 milyon 22 min manata yüksəldilmişdi.
Hazırda ekosistemdə PashaPay-ə məxsus iki əsas ödəniş xidməti var – MilliÖn və m10.
Şirkət 2021-ci ilə qədər “Komtec LTD” MMC kimi adlandırılırdı və “MilliÖn” ödəniş terminalının sahibdir. Holdinqin tərkibinə keçdikdən sonra “PashaPay” adlandırılıb.
“Komtec LTD” MMC kimi adlandırılan şirkət Pasha Holdinqin tərkibinə keçdikdən sonra 2022-ci ildən “PashaPay” adlandırılıb. PashaPay, “xalq brendi” kimi tanınan, 2008-ci ildən əhalinin istifadəsinə verilmiş MilliÖN ödəmə sisteminin əsasında qurulub. Hazırda əhali bütün ölkə üzrə yayılmış 5500-dən çox MilliÖN terminalı vasitəsilə 700-dən çox xidmətdən istifadə etməklə ödənişlərini həyata keçirir. Bunların arasında mobil rabitə, kommunal xidmətlər, sığorta, dövlət rüsumları, hüquqi şəxslərin ödənişləri və digər xidmətləri qeyd etmək olar.
2022-ci ilin iyul ayında PashaPay yeni m10 mobil tətbiqini uğurla təqdim edərək fiziki şəxslər və sahibkarlara öz əməliyyatlarını sadələşdirmək üçün imkan yaratdı. Elektron pulqabı olan m10-un ən böyük üstünlüyü tamamilə komissiyasız ölkədaxili pul köçürmələridir. Şirkətin Bakı və Moskvadakı ofislərində 440-dan çox əməkdaş çalışır.
