May ayının 1-dən başlayaraq 31-nə qədər Azərbaycan Mərkəzi Bankı (AMB) xüsusi tənzimləmə rejimində iştirak üçün müraciətləri qəbul edəcək.
Bu barədə Azərbaycan Mərkəzi Bankının Baş direktoru Fərid Osmanov yeni rejimin təqdimat mərasimində bildirib.
“Requlyator baxışı maliyyə bazarlarında tənzimləyici olmaqla yanaşı maliyyə sisteminə innovasiyaların gətirilməsi və nəticədə maliyyə inkulizivliyinin genişləndirilməsi, artırılması, daha çox maliyyə xidmətlərinin rəqəmsal kanallar vasitəsilə əhatə dairəsinə artırılması, risk qiymətləndirilməsinin aparılması, risk qiymətləndirilməsinin aparılması və yekun nəticədə maliyyə sabitliyinin qorunaraq bərqərar olması məsələləri bizim ən aktual məsələlərimizdəndir.” deyə o bildirib.
AMB-nin Maliyyə texnologiyaları və innovasiyalar şöbəsinin rəisi Sahib Həsənov isə xüsusi tənzimləmə rejiminə təqdim ediləcək innovativ məhsullar, onların meyarları, seçim prosesi və istiqaməti barəsində məlumat verib.
Mərkəzi Bank tərəfindən yaradılan xüsusi tənzimləmə rejimi maliyyə institutları və FinTech təşkilatlarının innovativ maliyyə xidmətlərinin müəyyən edilmiş müddət və nəzarəti altında real müştərilərlə sınaqdan keçirilməsinə, xidmətin bazarda tətbiqi müddətinin daha da sürətləndirilməsinə, onun rəqabətə davamlılığının artırılmasına və bir sıra maneələrin aradan qaldırılmasına imkan yaradır.
