Apple şirkəti, Google ilə süni intellekt sahəsində yeni və gizli tərəfdaşlıq sazişi üzərində işləyir. Bloomberg-in məlumatına görə, razılaşmaya əsasən, Apple yenilənmiş Siri versiyasında Google-un xüsusi hazırlanmış Gemini modelindən istifadə edəcək və bunun üçün ildə təxminən 1 milyard dollar ödəyəcək.
Məxfi razılaşma: Google texnologiyası — Apple infrastrukturu
Məsələ ilə tanış mənbələr Bloomberg jurnalisti Mark Gürmana bildiriblər ki, Apple bu addımı öz süni intellekt modelləri tam hazır olana qədər müvəqqəti həll kimi nəzərdə tutur.
Şirkətlər artıq 1,2 trilyon parametrə malik xüsusi Gemini modelinə çıxış imkanı verəcək razılaşmanın detalları üzərində son mərhələdədirlər.
Razılaşmaya əsasən, Google-un modeli Siri-nin məlumatların emalı və mürəkkəb tapşırıqların icrası üzrə qərarvermə funksiyalarını yerinə yetirəcək.
Bununla belə, bəzi tapşırıqlar üçün Siri hələ də Apple-ın öz daxili modellərindən istifadə etməyə davam edəcək.
Tərəfdaşlıq ictimaiyyətə elan edilməyəcək
Bloomberg yazır ki, şirkətlər bu əməkdaşlığı rəsmi şəkildə elan etməyi planlaşdırmır.
Apple Google-u “gizli texnologiya tədarükçüsü” kimi saxlamaq niyyətindədir.
Gemini modeli Apple Private Cloud Compute infrastrukturunda yerləşdiriləcək — bu da istifadəçi məlumatlarının məxfiliyini qorumaq məqsədi daşıyır.
Apple digər İA şirkətləri ilə də danışıqlar aparıb
Bloomberg-in məlumatına görə, Apple Google ilə yanaşı OpenAI və Anthropic kimi şirkətlərlə də əməkdaşlıq imkanlarını nəzərdən keçirib.
Hətta Mistral AI və Perplexity kimi startapların alınması ehtimalı da qiymətləndirilib, lakin sonda bu variantlardan imtina olunub.
Nəticədə, Apple tərəfdaşlıq üçün ən optimal seçim kimi Google-u seçib.
Apple-ın öz modeli yoldadır
Mənbələr bildirirlər ki, Apple hal-hazırda 1 trilyon parametrə malik öz süni intellekt modelini hazırlayır və onu 2026-cı ildə təqdim etməyi planlaşdırır.
Şirkət rəhbərliyi bu modelin Gemini və digər qabaqcıl İA sistemləri ilə eyni səviyyədə olacağına inanır.
📰 Mənbə: Bloomberg
