OpenAI həmçinin Amazon-un çiplərindən istifadə etməyi planlaşdırır. Sövdələşmə çərçivəsində şirkətin dəyəri 500 milyard dollardan çox qiymətləndirilə bilər.
Reuters agentliyinin mənbələrə istinadən yazdığına görə, sövdələşmə ilə bağlı müzakirələr OpenAI-nin 2027-ci ildə səhmlərini ictimai təklif (IPO) etmə planları fonunda aparılır. Amazon-un mümkün investisiyası təxminən 10 milyard ABŞ dolları, OpenAI-nin dəyərinin isə 500 milyard ABŞ dollarından çox ola biləcəyi bildirilir.
Nəşr qeyd edir ki, bu addım OpenAI-nin qeyri-kommersiya mənşəyindən uzaqlaşdıqdan və Microsoft ilə münasibətləri tənzimlədikdən sonra geniş şirkətlər dairəsi ilə tərəfdaşlıq qurmaq qabiliyyətini nümayiş etdirir.
Bundan əlavə, OpenAI Nvidia və Google həlləri ilə rəqabət aparan Amazon Trainium çiplərindən istifadə etməyi planlaşdırır. Şirkət həmçinin ChatGPT-nin korporativ versiyasını Amazon-a satmaq imkanını da nəzərdən keçirir.
Qeyd olunur ki, Amazon eyni zamanda ChatGPT-yə rəqib olan Claude çat-botunu inkişaf etdirən Anthropic süni intellekt startapının investorlarından biridir. Amazon-un bu startapa ümumi investisiya həcmi 8 milyard ABŞ dolları təşkil edir. Şirkət Anthropic-in 2026-cı ildə IPO keçirməsi ilə bağlı danışıqlar da aparır.
Xatırladaq ki, 2025-ci ilin dekabr ayının əvvəlində The Information mənbələrə istinadən yazmışdı ki, OpenAI-nin rəhbəri Sem Altman şirkət daxilində “Qırmızı Kod” elan edib. Əməkdaşların böyük hissəsi ChatGPT-nin performansının yaxşılaşdırılmasına yönəldilib, digər layihələr isə müvəqqəti olaraq təxirə salınıb. Bundan sonra OpenAI GPT-5.2 modelini təqdim edib.
