m10 fintex həlli və beynəlxalq ödəniş sistemi Mastercard əməkdaşlıq çərçivəsində m10 rəqəmsal kartını təqdim edib.
Məlumata görə, kart tam rəqəmsal formatdadır və m10 tətbiqi daxilində dərhal aktivləşdirilə bilir. İstifadəçilər kartı Apple Pay və Google Pay-ə əlavə edərək ölkə daxilində və xaricdə onlayn və kontaktsız ödənişlər həyata keçirə bilərlər.
Rəqəmsal m10 kartı m10 cüzdanı ilə eyni balansdan istifadə edir və əlavə bank hesabının açılmasını tələb etmir. Kartdan onlayn alış-veriş, NFC əsaslı nəqliyyat ödənişləri və kontaktsız əməliyyatlar üçün istifadə etmək mümkündür. Kartdan istifadə üçün şəxsiyyət təsdiqi (KYC) prosedurundan keçmək lazımdır.
Bildirilir ki, əməliyyatların təhlükəsizliyi Mastercard-ın antifrod və təhlükəsizlik texnologiyaları ilə təmin olunur. Yaxın dövrdə istifadəçilər üçün loyallıq proqramlarının da tətbiqi planlaşdırılır.
m10-un Məhsul üzrə sahə rəhbəri Leyla Məmmədova bildirib ki, rəqəmsal kart gündəlik ödənişləri daha rahat və sürətli etmək məqsədi daşıyır.
Qeyd edək ki, bu layihə Azərbaycanda fintex brendi ilə Mastercard arasında ilk əməkdaşlıq hesab olunur.
