Amazon dronları ilə çatdırılma xidmətini Texas və Arizonada müvəqqəti olaraq dayandırıb. Bu qərar, yağışlı hava şəraitində keçirilən sınaqlar zamanı MK30 modelindən olan iki cihazın qəzaya uğramasından sonra qəbul edilib. Bloomberg-in məlumatına görə, cihazlardan biri yerə düşdükdən sonra alovlanıb.
Şirkət çatdırılma xidmətini proqram təminatını yenilədikdən və ABŞ Federal Mülki Aviasiya Administrasiyasından (FAA) icazə aldıqdan sonra yenidən bərpa edəcək.
Amazon ABŞ-da dron vasitəsilə kommersiya yüklərinin çatdırılması üçün ilk icazəni 2020-ci ildə alıb. 2024-cü ildə FAA operatorların birbaşa görmə zonasından kənarda çatdırılmaları da təsdiqləyib.
Amazon-un əsas məqsədi 2030-cu ilə qədər ildə təxminən 500 milyon çatdırılmanı dron vasitəsilə həyata keçirməkdir. Lakin Bloomberg-in qeyd etdiyinə görə, Prime Air xidməti hələ ki, yalnız Texas və Arizonada kiçik sınaqlarla məhdudlaşdırılıb. Şirkət 2024-cü ildə Kaliforniyadakı sınaq poliqonunu bağlayıb.
Eyni zamanda, Amazon ABŞ-dan kənarda dronlarla çatdırılma imkanlarını da araşdırır. 2024-cü ilin dekabrında şirkət bu xidməti İtaliyada sınaqdan keçirib və yaxın zamanda Böyük Britaniyada testlər keçirməyi planlaşdırır.
