Pərakəndə sektorunda müştəri siqnallarını real vaxt rejimində fərdi qərarlara çevirən süni intellekt (Sİ) əsaslı qərarvermə platforması Replenit 2.5 milyon dollar həcmində pre-seed investisiya cəlb edib. Maliyyələşmə turuna Movens Capital və Vastpoint birgə rəhbərlik edib. Turda həmçinin Caucasus Ventures, Logo Ventures, DigitalOcean Ventures, Finbergz və ElevenLabs şirkətinin həmtəsisçisi və CEO-su Mati Staniszewski iştirak edib. Martech sahəsində unicorn səviyyəsinə çatmış şirkətin inkişafında təcrübəsi olan sahibkarlar tərəfindən yaradılan Replenit artıq ilk ilində qlobal miqyasda 30-dan çox iri pərakəndə şirkətlə işləyir.
Bu gün pərakəndə şirkətləri geniş müştəri məlumatlarına və idarəetmə sistemlərinə malik olsalar da, qərarvermə hələ də statik qaydalar, ümumi seqmentlər və yalnız keçmiş məlumatlara əsaslanan modellərlə məhdudlaşır. Nəticədə ciddi “intellekt boşluğu” yaranır: istehlakçıların 50%-dən çoxu fərdiləşdirmənin düzgün hədəflənmədiyini bildirir (Deloitte), marketoloqların 90%-i birinci tərəf məlumatlarını kritik hesab etsə də, onların yalnız 30%-dən azı bu məlumatları effektiv şəkildə inteqrasiya edir (BCG). Sİ əsaslı axtarış artıq istehlakçıların məhsul tapma və qiymətləndirmə üsullarını dəyişir və 2028-ci ilə qədər 750 milyard dollarlıq istehlak xərclərinə təsir göstərəcəyi gözlənilir (McKinsey). Bu isə pərakəndəçilər qarşısında real vaxtda, fərdi səviyyədə yüksək keyfiyyətli qərarlar vermək tələbi yaradır.
Replenit bu boşluğu “Theory of Mind” konsepsiyasından ilhamlanan düşünmə qatını tətbiq etməklə aradan qaldırır. PhD səviyyəli Sİ tədqiqatçıları tərəfindən hazırlanmış sistem istifadəçi davranışlarını niyyət və kontekst göstəricisi kimi şərh edir və pərakəndəçilərə keçmişə reaksiya vermək əvəzinə, hər an üçün düzgün addımı müəyyən etməyə imkan yaradır. Qayda əsaslı avtomatlaşdırmadan fərqli olaraq, sistem real vaxtda hər bir müştərinin ehtiyacını müəyyənləşdirir və insan düşüncəsinə daha yaxın analizlə ən uyğun addımları seçir. Bu isə kütləvi marketinqdən fərqli olaraq həqiqətən fərdiləşdirilmiş müştəri təcrübəsi yaradır.
Replenit-in həmtəsisçisi və CEO-su Ilyas Kurklu bildirib: “Pərakəndəçilər artıq yalnız proqnozlara güvənə bilməz. Onlar niyyəti anlamaq, kontekstdə düşünmək və hər bir müştəri üçün növbəti addımı müəyyən etməlidirlər. Bu gün bir çox Sİ alətləri effektivlik və ya kontent yaradılmasına fokuslanır, lakin əsas problem qərarvermədir. Replenit hər bir kommersiya qərarının keyfiyyətini artırır və şirkətlərə statik qaydalardan real vaxtda, Sİ əsaslı hərəkətlərə keçməyə imkan verir.”
Platforma Databricks, Salesforce, Braze, Bloomreach və Klaviyo kimi mövcud sistemlərlə inteqrasiya olunur və müştəri saxlanması, təkrar alışlar və mövcud məlumatlardan daha yüksək dəyər əldə olunmasını təmin edir. Praktik nəticə olaraq, ümumi kampaniyaların sayını artırmadan gəlirlərdə ciddi artım əldə edilir. L’Occitane en Provence şirkəti Replenit tətbiqindən sonra satış sonrası gəlirlərini 235% artırıb. Avropanın tanınmış “flash-deal” platformalarından biri olan iBOOD isə ümumi gəlirinin 6.3%-ni Replenit vasitəsilə əldə olunan qərarlara bağlayır. Hər müqavilədə 10 dəfə ROI zəmanəti və nəticə əldə olunmadığı halda çıxış imkanı da təqdim olunur və indiyədək heç bir müştəri bu imkandan istifadə etməyib.
Movens Capital şirkətinin investisiya direktoru Lukasz Lewandowski bildirib ki, pərakəndəçilər böyük həcmdə məlumatlara malik olsalar da, az sayda şirkət bunu real vaxtda gəlir gətirən qərarlara çevirə bilir. Onun sözlərinə görə, Replenit bu boşluğu dolduran Sİ qatını yaradır və müştərinin alışa hazır olduğu anda düzgün addım atmağa imkan verir.
Replenit altı türk sahibkar tərəfindən təsis edilib və onların ümumi 40 ildən artıq B2B SaaS və martech sahəsində beynəlxalq təcrübəsi var. Bu komanda daha əvvəl Türkiyədə qurulmuş bir martech startapını 26 ölkədə 2 milyard dollar dəyərinə qədər böyütməyə nail olub. Şirkətin baş ofisi Varşavada yerləşir, texniki əməliyyatları isə Niderlandda həyata keçirilir.
Replenit-in hekayəsi daha geniş bir tendensiyanı da əks etdirir. Polşa uzun müddətdir Ukrayna və Belarusdan olan sahibkarları cəlb edir və son illərdə Türkiyə və Baltikyanı ölkələrdən olan komandalar da Varşavanı Avropa bazasına çıxış üçün seçir. Vastpoint şirkətinin partnyoru Karolina Kukiłka bildirib ki, müxtəlif istedadların bir araya gəlməsi Polşanın texnologiya mərkəzi kimi uğurunun əsas amillərindən biridir.
Cəlb olunan 2.5 milyon dollar investisiya məhsulun inkişafına, Sİ tədqiqatlarına və Polşa ilə Niderlanddakı komandaların genişləndirilməsinə yönəldiləcək. Şirkət həmçinin 2026-cı ilin sonuna qədər ABŞ bazarında iştirakını artırmağı və yerli komanda qurmağı planlaşdırır. Replenit texnologiyasını pərakəndə sektorunda əsas “intellekt qatı” kimi mövqeləndirməyi hədəfləyir.
Mənbə: tech.az
