Dubay mərkəzli e-ticarət platforması Noon potensial ilkin kütləvi təklifə (IPO) hazırlıq çərçivəsində mövcud investorlarından 500 milyon ABŞ dolları həcmində yeni investisiya cəlb edib. Bu investisiya Körfəz regionunda rəqəmsal ticarət sektorunda artan rəqabət fonunda investorların şirkətə olan etimadının davam etdiyini göstərir.
Noon-un son maliyyələşmə raundunda Səudiyyə Ərəbistanının Suveren Sərvət Fondu – İctimai İnvestisiya Fondu (PIF) və şirkətin qurucusu və İdarə Heyətinin sədri Məhəmməd Ələbbar iştirak edib. Ələbbar eyni zamanda Dubayda yerləşən Emaar Properties daşınmaz əmlak şirkətinin də sədridir.
Məsələdən məlumatlı mənbələrə görə, investisiya mövcud səhmdarlardan cəlb olunub, lakin maliyyələşmə raundunun qiymətləndirmə detalları açıqlanmayıb. PIF nümayəndəsi şərh verməkdən imtina edib, Noon və Məhəmməd Ələbbar isə mediaya sorğulara cavab verməyib. Noon 2016-cı ildə PIF-in dəstəyi və Ələbbarın rəhbərlik etdiyi investor qrupu tərəfindən təsis edilib. Bildirilir ki, PIF şirkətin təxminən 50 %-lik payına sahibdir, qalan səhmlər isə özəl investorların əlindədir.
Yaradıldığı gündən bəri 2,7 milyard dollar investisiya
Noon bazara Amazon-un Dubay mənşəli Souq.com platformasını 580 milyon dollara almasının ardından daxil olub və regional bazarda qlobal e-ticarət nəhənglərinə alternativ olmağı hədəfləyib. Zamanla şirkət yalnız e-ticarətlə kifayətlənməyərək sürətli çatdırılma, qida və gündəlik tələbat malları xidmətlərini də portfelinə əlavə edib.
Məhəmməd Ələbbarın Financial Times nəşrinə verdiyi əvvəlki açıqlamalara görə, Noon yaradıldığı gündən bu yana ümumilikdə 2,7 milyard ABŞ dolları investisiya cəlb edib. Şirkətin hazırkı bazar dəyəri təxminən 10 milyard dollar səviyyəsində qiymətləndirilir.
Körfəz regionunda rəqabət kəskinləşir
Noon-un yeni investisiya raundu Körfəz regionunda rəqəmsal ticarət ekosistemində rəqabətin sürətlə artdığı bir dövrə təsadüf edir. Qlobal və regional oyunçular bazar payı qazanmaq üçün e-ticarət, onlayn marketlər, qida çatdırılması və “quick commerce” sahələrinə investisiyalarını artırırlar.
Amazon regionda gündəlik tələbat malları üzrə fəaliyyətini genişləndirərkən, Çin mənşəli Meituan Yaxın Şərqdə qida çatdırılması və dark store modellərini tətbiq edib. Bu arada, Səudiyyə Ərəbistanında fəaliyyət göstərən Ninja adlı sürətli ticarət startapı bu ilin əvvəlində cəlb etdiyi 250 milyon dollarlıq investisiyadan sonra aqressiv böyümə mərhələsinə keçib. Bu proseslər bazarda qiymət rəqabətini gücləndirir və şirkətləri logistika infrastrukturu, texnologiya yatırımları və müştəri cəlbetmə xərclərinə daha çox vəsait ayırmağa məcbur edir.
Noon-un IPO-su regionun ən iri texnologiya IPO-larından biri ola bilər
500 milyon dollarlıq investisiya Noon-un potensial IPO ərəfəsində maliyyə dayanıqlığını gücləndirən mühüm addım kimi qiymətləndirilir. Məhəmməd Ələbbar daha əvvəl şirkətin növbəti iki il ərzində IPO keçirməyi planlaşdırdığını bildirmişdi. Bununla belə, IPO-nun dəqiq tarixi və hansı birjada keçiriləcəyi ilə bağlı hələlik rəsmi açıqlama yoxdur.
Reallaşacağı təqdirdə, Noon-un IPO-su Yaxın Şərqdən çıxan ən iri texnologiya IPO-larından biri ola bilər. Bu addım eyni zamanda Körfəz ölkələrinin, xüsusilə Səudiyyə Ərəbistanı və BƏƏ-nin, kapital bazarlarını dərinləşdirmək və texnologiya əsaslı iqtisadi şaxələndirmə məqsədləri ilə üst-üstə düşür.
Hazırda Səudiyyə Ərəbistanı və BƏƏ-də qərargahları olan Noon onlayn bazar, qida çatdırılması və onlayn market xidmətlərini əhatə edən çoxkanallı rəqəmsal platforma kimi fəaliyyət göstərir. Şirkət Səudiyyə Ərəbistanı, BƏƏ və Misirdə fəaliyyətini davam etdirərək regionun sürətlə böyüyən rəqəmsal pərakəndə bazarında mövqeyini gücləndirir.
