Azərbaycanda AZQR standartı üzrə ödənişlərin tətbiqində növbəti mərhələyə keçid edilib. 2024-cü ilin avqust ayından etibarən ABB-nin POS-terminallarında AniPay QR vasitəsilə ödəniş imkanı istifadəyə verilib.
Bu barədə ABB-nin Tərəfdaşlıq Əlaqələri Departamentinin direktor müavini Afag Yusifzadə Linkedin platformasında məlumat verib.
Məlumata görə, ilkin mərhələdə AZQR ilə ödənişlər əsasən ABB Mobile tətbiqi üzərindən həyata keçirilib. Sonradan müştəri təcrübəsinin sadələşdirilməsi məqsədilə tətbiqdə widget funksiyası əlavə olunaraq QR oxutma prosesi birbaşa keçid formasında optimallaşdırılıb.
Mərkəzi Bankın dəstəyi ilə hesab əsaslı ödəniş metodlarının təşviqi çərçivəsində digər banklar da mərhələli şəkildə AZQR standartlı QR kodların oxudulmasını öz mobil tətbiqlərində aktivləşdirir. Hazırda 5 bankın mobil tətbiqi vasitəsilə AZQR ödənişləri real mühitdə dəstəklənir.
Bildirilib ki, ABB-nin POS-terminalları AZQR ödənişlərini qəbul etməyi dəstəkləyir. Növbəti mərhələdə bazarda AZQR standartını dəstəkləyən mobil tətbiqlərin sayının artırılması nəzərdə tutulur.
Qeyd olunub ki, AZQR ödənişləri satış məbləğinin partnyor hesabına dərhal mədaxil edilməsi və daha sərfəli bank komissiyaları kimi üstünlüklər təqdim edir və bu da həllin ticarət tərəfdaşları üçün cəlbediciliyini artırır.
