Tərtibatçılar burada öz xidmətlərini yerləşdirə biləcəklər.
OpenAI ChatGPT platforması daxilində monetizasiya imkanları olan tətbiqlər mağazasını işə salıb. Şirkət ChatGPT ilə inteqrasiya olunmuş bütün tətbiqlərin yer aldığı kataloq təqdim edib.
Bu kataloqa Canva, Adobe Photoshop, Uber, Spotify, Apple Music, TripAdvisor, Slack, Zoom, Microsoft Teams və Airtable kimi məşhur xidmətlər daxildir. Eyni zamanda, daha əvvəl “Konnektorlar” bölməsi vasitəsilə qoşulan Google Disk və Outlook xidmətləri də artıq bu mağazada yer alır.
Tətbiqlər mağazasında yer almaq üçün OpenAI platformasında xüsusi forma doldurmaq tələb olunur. Əsas şərtlər arasında tətbiqin orijinal olması və istifadəçi yönümlü dizayna malik olması göstərilir. Tərtibatçılar tətbiqlərini Anthropic şirkətinin Model Context Protocol-una əsaslanan SDK standartı vasitəsilə yarada bilərlər.
Mağazada yerləşdirilən tətbiqlərə abunəlik əsasında premium funksiyalar, reklam və daxili alışlar əlavə etməklə gəlir əldə etmək mümkündür.
OpenAI 2026-cı ildə monetizasiya imkanlarını daha da genişləndirməyi, o cümlədən rəqəmsal məhsulların dəstəklənməsi və komissiya mexanizmlərinin tətbiqini planlaşdırır.
Qeyd edək ki, OpenAI 6 oktyabr 2025-ci ildə ChatGPT-də üçüncü tərəf xidmətlərlə inteqrasiyanı tətbiq edib. Bu xidmətləri xüsusi ikon vasitəsilə çağırmaq və çat-bota təbii dildə tapşırıqlar vermək mümkündür. Tətbiqlər bütün istifadəçilər üçün pulsuz əlçatandır və istifadəçi bu funksiyanı aktiv edərsə, ChatGPT-nin “Yaddaş” bölməsindəki məlumatlardan istifadə edə bilir.
