Yeni tənzimləməyə əsasən, Türkiyə dövlət qurumlarının ödənişlərində Troy və PTT kimi yerli ödəniş infrastrukturundan istifadə məcburi olacaq, lakin istifadəçi tələbinə uyğun olaraq Visa və ya Mastercard da seçilə biləcək.
Türkiyədə dövlət ödənişlərində yerli kart sistemlərindən istifadə ilə bağlı yeni bir tənzimləmə qəbul edilib. Bu qərar yerli iqtisadiyyatı dəstəkləmək və iqtisadi riskləri azaltmaq məqsədilə həyata keçirilib.
Yeni tənzimləməyə əsasən, dövlət qurumları və təşkilatları, əməkhaqları, təqaüdlər, sosial yardımlar, tələbə təqaüdləri kimi ödənişlərdə istifadə etdikləri bank və kredit kartlarında yerli ödəniş sistemlərini (məsələn, Troy, PTT kimi) prioritet olaraq seçəcək. Lakin istifadəçi tələbinə uyğun olaraq, beynəlxalq ödəniş sistemləri olan Visa və Mastercard-dan istifadə də mümkün olacaq.
Bundan əlavə, dövlət bankları tərəfindən təqdim edilən bütün bank, kredit və əvvəlcədən ödənilmiş kartlarda, dövlət ödənişlərinə aid olmasa belə, yerli kart sistemlərinin seçilməsi əsas götürüləcək.
Hansı ödənişləri əhatə edir?
Bu tənzimləmə çərçivəsində, aşağıdakı ödənişlərdə yerli kart sistemlərinin prioritet olaraq istifadə olunacağı qeyd edilib:
- İşçilərə veriləcək əməkhaqqı ödənişləri
- Təqaüdlər
- Sosial yardım ödənişləri
- Tələbə təqaüdləri və kreditləri
- Fermer və sahibkar dəstəyi ödənişləri
- İctimai nəqliyyat, yemək, şəxsiyyət vəsiqəsi və tələbə kartlarına edilən ödənişlər
- Avans vasitəsilə kartlara edilən əvvəlcədən ödənişlər
- Bank protokollarına əsasən hüquq sahiblərinə edilən digər ödənişlər
Bu tənzimləmə Türkiyədə fəaliyyət icazəsinə malik olan kartlı ödəniş sistemlərini dəstəkləyərək yerli iqtisadiyyatın gücləndirilməsini hədəfləyir.
Yeni tənzimləmə, dövlət ödənişlərində Visa və Mastercard-dan istifadəyə tamamilə son qoyur, lakin fərdi istehlakçılar üçün heç bir məcburiyyət tətbiq etmir. Özəl banklar və fərdi müştərilər Visa və Mastercard-dan istifadə etməyə davam edə bilərlər. Lakin dövlət tərəfindən dəstəklənən ödənişlər və dövlətə məxsus bank kartları artıq yalnız TROY ilə işləyəcək.
