Amerikalı Forbes nəşri texnologiya dünyasında yeni bir tendensiyadan bəhs edir: bağlanan şirkətlərin korporativ məlumatları süni intellekt modelləri üçün dəyərli bir resursa çevrilir. Bu, həm sahibkarlara əlavə gəlir mənbəyi, həm də işçilərin məxfiliyi üçün ciddi risk deməkdir. Süni intellekt sahəsindəki rəqabətin kəskinləşdiyi bir dövrdə məlumat axtarışı getdikcə daha aqressiv xarakter alır.
Altyazı xidməti cielo24-ün əsasçısı Şanna Conson şirkətini ləğv edərkən 13 il ərzində topladığı korporativ məlumatları sataraq “yüz minlərlə dollar” qazandığını açıqlayıb. Satılan məlumatlar arasında işçilərin Slack yazışmaları, elektron məktub arxivləri, Jira-dakı tapşırıq qeydləri, həmçinin Google Drive-dan terabaytlarla sənəd və fayl yer alıb. Bu prosesdə ona SimpleClosure startapı yardımçı olub.
SimpleClosure-un rəhbəri Dori Yonun sözlərinə görə, bağlanan şirkətlərin məlumatlarına tələbat durmadan artır: süni intellekt tərtibatçıları modellərini öyrətmək üçün yeni məlumat mənbələri axtarışında “vəsvasə düşüblər”. Ekspertlər bildirir ki, internet artıq məlumat mənbəyi kimi tükənib və virtual işçi kimi fəaliyyət göstərməli olan “agent” sistemlərinin öyrədilməsi üçün əlverişli deyil. Real işçilərin tapşırıqlar, səhvlər və iş axışları ilə bağlı məlumatları isə bu boşluğu doldurmaq üçün ideal hesab olunur.
Bu tələbatı ödəmək məqsədilə SimpleClosure Asset Hub platformasını istifadəyə verib. Platforma vasitəsilə son bir il ərzində ümumi dəyəri 1 milyon dolları keçən təxminən 100 müqavilə bağlanıb. Məlumat dəstinin qiyməti orta hesabla 10 min ilə 100 min dollar arasında dəyişir. SimpleClosure-un rəqibi olan Sunset şirkəti isə bağlanan müəssisələrin məlumatlarını birbaşa alıb süni intellekt tərtibatçılarına satır. Sunset-in rəhbəri Brendan Mahona görə qiymət şirkətin yaşına, məlumat həcminə və “zənginliyinə” görə müəyyən edilir: konkret kod fraqmentiylə əlaqəli Jira tapşırığı dağınıq məlumatdan qat-qat baha başa gəlir. Səhiyyə və maliyyə sektorlarına aid məlumatlar isə ən yüksək qiymətə satılır.
Bununla belə, bir sıra ekspertlər işçilərin məxfiliyinə dair ciddi narahatlıqlarını dilə gətirir. İşçilərin yazışmalarının və iş nəticələrinin üçüncü şəxslərə satılacağını heç kim onlara əvvəlcədən bildirməyib. SimpleClosure satılan bütün məlumatların anonimləşdirildiyini iddia etsə də, mütəxəssislər bu problemin hələlik effektiv həllinin olmadığını vurğulayır. Süni intellektin sürətlə inkişaf etdiyi bu dövrdə məlumat etikası məsələsi getdikcə daha aktual xarakter alır.
Mənbə: vc.ru
