ABŞ-nin “OpenAI” elmi-tədqiqat təşkilatı 2026-cı ilin birinci rübündə daha təbii səs qarşılıqlı əlaqəsinə yönəlmiş yeni audio modelini təqdim etməyi planlaşdırır.
“OpenAI” son aylarda bir neçə mühəndislik, məhsul və tədqiqat qrupunu vahid təşəbbüs ətrafında birləşdirib. Məqsəd şirkətin audio modellərini təkmilləşdirməkdir. “ OpenAI” tədqiqatçılarının özlərinin fikrincə, onlar hazırda dəqiqlik və sürət baxımından mətn əsaslı modellərdən geri qalırlar.
Şirkət həmçinin qeyd edir ki, “ChatGPT”nin səs interfeysi mətn əsaslı həmkarından daha az populyar olaraq qalır: əksər istifadəçilər sorğularını yazmağa üstünlük verirlər. Gözlənildiyi kimi, yeni audio model daha “insani” dialoqu dəstəkləyəcək, fasilələrə müvafiq şəkildə cavab verəcək və real vaxt rejimində söhbət aparacaq. “OpenAI” daha təbii və sürətli audio qarşılıqlı təsirlərin istifadəçi vərdişlərini dəyişdirəcəyinə və süni intellekt tətbiqini genişləndirəcəyinə ümid edir. Bu imkanlar həmçinin bir il ərzində satışa çıxarılacağı gözlənilən “OpenAI”nin ilk aparat məhsulunun əsasını təşkil edəcək.
Şirkətin əməkdaşları gələcək cihazlar üçün ağıllı dinamiklərdən tutmuş eynəklərə qədər müxtəlif formatları müzakirə ediblər. Lakin əsas diqqət məhz ekransız audio interfeyslərə yönəlib. “OpenAI” ənənəvi cihazlardan daha çox şəxsi yoldaşlar kimi işləyəcək bu cür cihazların bütöv bir xəttini yaratmağı düşünür.
Kütləvi süni intellekt cihazları yaratmaq üçün əvvəlki cəhdlər əsasən uğursuz olub. Yüz milyonlarla dollara başa gələn “Humane AI Pin” daşınabilən cihaz məhdud funksionallığı və yüksək qiyməti səbəbindən populyarlıq qazana bilmədi. “Friend AI” kulon kimi digər layihələr istifadəçi marağından daha çox məxfilik və daimi dinləmə ilə bağlı narahatlıq doğurub.
“OpenAI”ın aparat istiqamətinin inkişafı ilə “Apple”ın keçmiş baş dizayn direktoru Coni Ayv məşğul olur. Ayv səsə yönəlmiş cihazları istifadəçilərin ekranlardan asılılığını azaltmaq və istehlakçı elektronikasına yanaşmanı yenidən təşkil etmək üçün bir yol kimi görür.
