TechCrunch və The Verge yazır ki, bu multimodal modellər şəkilləri analiz edə və yenilərini yarada bilir. Modelin ölçüləri 1 milyarddan 7 milyard parametrlər arasında dəyişir. Açıq mənbə koduna malik olan Janus Pro, Hugging Face platformasında yerləşdirilib. Eyni zamanda, modelin pulsuz demo versiyası da mövcuddur.
Janus Pro yalnız 384 x 384 pikselə qədər çözünürlükdə şəkilləri analiz və generasiya edə bilir. Bu məlumatı Reuters yayıb və qeyd edib ki, bu model DeepSeek-in 2024-cü ilin sonunda təqdim etdiyi Janus-un yenilənmiş versiyasıdır. Şirkət açıqlayıb ki, yeni model təkmilləşdirilmiş öyrənmə prosesləri, daha yüksək keyfiyyətli məlumat və böyük model ölçüsü sayəsində əvvəlki versiyanı üstələyir.
“Az əvvəl Janus-Pro-7B ilə tennis topuna bənzəyən quş şəkli yaratmağa çalışdım, alınan nəticə belə oldu.” Mənbə: Alex
Şirkətin məlumatına görə, GenEval və DPG-Bench testlərində Janus-Pro-7B, Stable Diffusion 3 Medium və OpenAI-dən DALL-E 3 modellərindən daha yüksək nəticə göstərib.
DeepSeek ətrafındakı ajiotaj davam edir
27 yanvar 2025-ci ildə startapın tətbiqi ABŞ App Store-da ən çox yüklənən pulsuz tətbiqə çevrilib və OpenAI-nin ChatGPT-ni ikinci yerə sıxışdırıb. Bunun ardınca bəzi istifadəçilər nasazlıqla qarşılaşıb, İT şirkətlərinin səhmləri kəskin şəkildə enib və DeepSeek istifadəçi qeydiyyatını kiberhücum səbəbindən məhdudlaşdırıb.
