Son vaxtlar canlı yayım alış-veriş trendinin xüsusilə Asiya ölkələrində olduqca məşhur olduğunu bir çox dəfə qeyd etmişdik. Canlı yayım əsaslı e-ticarət sistemini Avropa ölkələrinə gətirmək məqsədilə qurulan Tilt, yeni sərmayə aldığını elan edib.
Tilt tərəfindən verilən məlumata görə, startap A seriyası sərmayə turunda 18 milyon dollar sərmayə cəlb edib. Bu 18 milyon dollarlıq A seriyası sərmayə turuna Balderton Capital rəhbərlik edib. Tura həmçinin TQ Ventures, Earlybird və Seedcamp kimi şirkətin mövcud sərmayəçiləri də qatılıb.
Bu 18 milyon dollarlıq yeni sərmayə ilə Tilt-in indiyədək aldığı ümumi sərmayə məbləği 21 milyon dollara çatıb.
2021-ci ildə Neil Shah və Abhi Thanendran tərəfindən Londonda qurulan Tilt, canlı yayım əsaslı alış-verişlərin reallaşdırıldığı bir platform təqdim edir. Startapın canlı yayım alış-veriş platforması 2023-cü ilin ilk aylarında istifadəyə verilib. Tilt tərəfindən verilən məlumata görə, platformanın 500 mindən çox istifadəçisi var.
Xüsusilə moda kateqoriyasındakı məhsulların canlı yayım vasitəsilə satılmasına fokuslanan Tilt, platformasında influencer-lər və e-ticarət markaları üçün canlı yayım otaqları təqdim edir. İstifadəçilər, canlı yayımlar vasitəsilə tanıdılan məhsulları birbaşa platforma üzərindən ala bilərlər.
Tilt platforması daxilində püşklər də keçirildiyini, hətta satıcıların real vaxtda açıq artırmalar təşkil edə bildiyini qeyd edək. Hazırda yalnız mobil tətbiqlər vasitəsilə istifadəçilərinə xidmət göstərən Tilt, həm Android, həm də iOS üçün mobil tətbiqlərə sahibdir.
Birləşmiş Krallıq bazarında sürətlə böyüyən Tilt, gələcəkdə Avropa ölkələrində də canlı yayım alış-verişlərinin populyarlaşmasına səbəb ola bilər.
