Azərbaycanın Prezidenti İlham Əliyev “Rəqəmsal iqtisadiyyatın inkişafına dair 2026–2029-cu illər üçün Strategiya”nı təsdiqləyib. Yeni sənəd ölkədə rəqəmsal transformasiyanın sürətləndirilməsini, biznes mühitinin rəqəmsallaşdırılmasını və yeni texnologiyaların tətbiqinin genişləndirilməsini hədəfləyir.
Strategiyaya görə, Nazirlər Kabineti tədbirlərin icrasına nəzarəti, illik hesabatların təqdim edilməsini və digər əlaqələndirmə funksiyalarını həyata keçirəcək. Tədbirlərin monitorinqi isə İqtisadi İslahatların Təhlili və Kommunikasiya Mərkəzinə həvalə olunub.
Rəqəmsal transformasiya üzrə hədəflər
Müəssisələrin rəqəmsal transformasiyası
2029-cu ilə qədər rəqəmsal transformasiya proqramlarında iştirak edən müəssisələrin sayı 300-ə çatdırılacaq. Bu göstərici illər üzrə belə müəyyənləşdirilib:
- 2026 — 50 müəssisə
- 2027 — 100 müəssisə
- 2028 — 180 müəssisə
Rəqəmsal transformasiyadan keçmiş müəssisələrin EBİTDA göstəricisi isə 2029-cu ildə 58 milyon manata yüksəlməlidir.
Startap ekosistemi genişlənəcək
Yeni startapların sayı 2029-cu ilə qədər 250-yə çatdırılacaq:
- 2026 — 30
- 2027 — 80
- 2028 — 155
KOB-ların rəqəmsal bazarlara çıxışı
Kiçik və orta biznes subyektlərindən 200-nün rəqəmsal bazarlara inteqrasiya etməsi planlaşdırılır:
- 2026 — 20
- 2027 — 50
- 2028 — 100
GenAİ-nin iqtisadi təsiri artırılacaq
Strateji sənəddə süni intellektin, xüsusilə Generativ AI-in (GenAİ) iqtisadi təsirinin artırılması xüsusi hədəf kimi göstərilib. 2029-cu ilə qədər GenAİ tətbiqlərindən yaranan iqtisadi fayda 70 milyon manata çatmalıdır.
- 2026 — 10 milyon manat
- 2027 — 30 milyon manat
- 2028 — 50 milyon manat
Yeni rəqəmsal infrastruktur layihələri
“Rəqəmsal həllər və xidmətlər platforması”
Müəssisələrin rəqəmsal həllərə çıxışını asanlaşdırmaq üçün vahid platforma yaradılacaq. Onun əsas icraçısı İqtisadiyyat Nazirliyi olacaq. Platforma sayəsində rəqəmsal transformasiya etmiş müəssisələrin payının 20%-ə çatdırılması gözlənilir.
“Rəqəmsal İqtisadiyyatın İnkişafına Dəstək Proqramı”
Yeni proqram vasitəsilə KOB və iri müəssisələrin rəqəmsallaşması üçün:
- qrantlar,
- güzəştli kreditlər,
- beynəlxalq modellərə əsaslanan dəstək mexanizmləri təqdim ediləcək.
Sinqapurun “Go Digital” proqramından nümunə götürülən modelin ölkədə məhsuldarlığı artıracağı proqnozlaşdırılır.
“Yeni Nəsil Texnologiyalar Mərkəzi” yaradılacaq
Strategiya çərçivəsində müasir texnologiyaların tətbiqi və təlim xidmətləri üzrə fəaliyyət göstərəcək mərkəz yaradılacaq. Burada:
- azı 25 müəssisənin təlimlərə cəlb edilməsi,
- rəqəmsal transformasiya xidmətlərindən istifadə edənlərin sayının ildən-ilə artırılması,
- biznes proseslərində 15–30% səmərəlilik artımı
hədəflənir.
Mərkəz Türkiyənin MEXT və Sinqapurun Digital Capability Center modelləri əsasında fəaliyyət göstərəcək.
Ümumi gözləntilər
Strategiyanın icrası nəticəsində:
- əməliyyat səmərəliliyi 5–10% artacaq,
- ölkədə ən azı iki beynəlxalq standartlara uyğun data mərkəzi fəaliyyət göstərəcək,
- rəqəmsal iqtisadiyyatın qeyri-neft ÜDM-dəki payı və İKT sektorunun ümumi çəkisi davamlı artacaq.
