Amazon bu həftə Amerikada Amazon Autos-u işə salmaqla onlayn avtomobil satışlarına rəsmi olaraq start götürüb. Amazon Autos müştərilərə dilerlərdən yeni avtomobillər, yük maşınları və yolsuzluq avtomobilləri tapmaq, sifariş etmək və almaq imkanı verən e-ticarət biznesi olacaq. İlk mərhələdə Amazon, Hyundai ilə birlikdə ABŞ-ın 48 şəhərində, o cümlədən Atlanta, Boston, Çikaqo, Los-Anceles və Nyu-Yorkda satılan avtomobilləri müştərilərinə təhvil verəcək.
Artıq 2025-ci ildən daha çox şəhər və digər istehsalçıları da Amazon-da görmək mümkün olacaq. Alıcılar model, komplektasiya, rəng və xüsusiyyətlərə görə avtomobilləri axtara biləcəklər. Amazon Autos vasitəsilə müştərilər ödəmələri rəsmiləşdirə və sənədləri elektron şəkildə imzalaya biləcəklər.
Şirkət gələn il lizinq və genişləndirilmiş maliyyə imkanlarını əlavə etməyi də planlaşdırdığını bildirib.
