Financial Times yazır ki, əvvəlcə Çin tətbiqləri ABŞ-da “böyük” müştəri bazasını ucuz qiymətlər hesabına qazanmışdı. Bu qiymətlər isə “unikal” biznes modeli ilə dəstəklənirdi: məhsullar birbaşa Çindən kiçik bağlamalarla alıcılara göndərilir və bu, gömrük rüsumlarından yayınmağa imkan verirdi.
Amma 2 may 2025-ci ildə ABŞ prezidenti Donald Tramp Çindən və Honq-Konqdan göndərilən 800 dollara qədər dəyəri olan bağlamaları rüsumdan azad edən qaydanı ləğv etdi, üstəlik əvvəlcə 90%-lik rüsum tətbiq olundu, daha sonra bu rüsum 30%-ə endirildi.
Nəticədə şirkətlər qiymətləri məcburən artırdı. Bunun nəticəsi olaraq mart-iyun 2025 dövründə ABŞ-da Temu-nun aylıq aktiv istifadəçi sayı 51% azaldı — 40,2 milyon nəfərə düşdü. Shein-in istifadəçi sayı da azaldı, amma “o qədər kəskin deyil” — 12% azalaraq 41,4 milyon nəfər oldu.
Nəşr vurğulayır ki, hər iki marketplace ABŞ bazarında reklam xərclərini də azaldıb. Temu-nun reklam xərcləri ötən ilə nisbətən 87%, Shein-in isə 69% azalıb. 2024-cü ildə Temu ABŞ-da ən iri rəqəmsal reklamverənlər siyahısında 10-cu, Shein isə 11-ci yeri tuturdu. İndi isə onlar ilk 60-lığa belə daxil deyillər.
Eyni zamanda hər iki Çin platforması Avropada biznesini inkişaf etdirməyə başlayıb. Məsələn, Temu-nun 2025-ci ilin iyununda Fransada aktiv istifadəçi sayı ötən ilin eyni dövrü ilə müqayisədə 76%, İspaniyada 71%, Almaniyada isə 64% artıb. Shein-də bu artım 13-20% aralığında olub.
Financial Times qeyd edir ki, Çin marketplace-lərinin Avropadakı mövqeyi də risk altına düşə bilər, çünki Aİ hakimiyyəti birliyin xaricindən göndərilən €150-dək dəyəri olan hər bağlamaya €2 rüsum tətbiq etməyi nəzərdən keçirir.
