Rusiyanın iri onlayn pərakəndə şirkəti Wildberries & Russ Özbəkistanın dövlət poçt operatoru UzPost-da dövlətə məxsus payı satın alıb. Bu barədə məlumatı RBK öz mənbələrinə istinadən yayıb.
Məlumatda bildirilir ki, sövdələşmənin məbləği açıqlanmayıb. 2025-ci il oktyabrın 12-də “Gazeta.uz” nəşri mənbələrinə istinadla xəbər vermişdi ki, poçt operatorundakı dövlət payı (dəqiq həcmi göstərilməyib) rusiyalı onlayn ticarət nəhəngi tərəfindən alınıb. Öz növbəsində, “Spot” nəşrinin mənbəsi də UzPost-un özəlləşdirildiyini təsdiqləmişdi.
RBK verdiyi məlumara əsasən , həmin payı “RVV” MMC, yəni birləşmiş Wildberries & Russ şirkəti alıb.
Mənbələrin sözlərinə görə, sövdələşmə “bir müddətdir hazırlanırdı” və Wildberries-in Özbəkistanda geniş planları var. Şirkət hadisə ilə bağlı şərh verməkdən imtina edib. RBK həmçinin UzPost-a da rəsmi sorğu göndərib.
“Gazeta.uz” qeyd edir ki, əməliyyatdan öncə UzPost-un nizamnamə kapitalı təxminən 40% artırılıb – o cümlədən 50 poçt şöbəsinin binalarının 77,3 milyard sum (təxminən 516,2 milyon rubl) dəyərində şirkətin balansına keçirilməsi hesabına.
Hazırda UzPost-un bazar kapitallaşması 285,9 milyard sum (təxminən 1,9 milyard rubl) olaraq qiymətləndirilir.
UzPost 1992-ci ildə təsis edilib, 2014-cü ildən açıq səhmdar cəmiyyəti kimi fəaliyyət göstərir. Şirkətin 14 regional bölməsi, 1600 poçt şöbəsi, 3500-dən çox çatdırılma məntəqəsi və 7000-dən artıq əməkdaşı var.
