Sosial media platformu TikTok-un məzmun idarəetməsi üçün 40 min nəfərlik heyəti və süni intellekti istifadə etdiyini sizə çatdırmışdıq. Platforma bu gün yeni bir xəbər ilə gündəmə gəlib.
TikTok, məzmun yaradıcılarının qazanc əldə etməsinə imkan verən yeni bir abunəlik sistemini təqdim etdi. Bu xüsusiyyət Braziliya, Fransa, Almaniya, İspaniya, Böyük Britaniya, İndoneziya, İtaliya, Yaponiya, Cənubi Koreya və ABŞ məzmun yaradıcılarına təklif edilir. Artıq məzmun yaradıcıları abunəçilərinə özəl məzmunlar, canlı yayımlar və müxtəlif üstünlüklər təqdim edərək daha çox gəlir əldə edə biləcəklər.
Abunəlik sistemi üç fərqli səviyyə və qiymət seçimi təqdim edir. İstifadəçilər abunə olduqları zaman xüsusi videolara və yalnız abunəçilərə məxsus məzmunlara daxil ola biləcəklər. Bundan əlavə, abunəçilər üçün xüsusi ünsiyyət kanalları olan Sub Space-ə giriş təmin olunacaq. Bu sahə məzmun yaradıcılarının abunəçiləri ilə daha sıx əlaqə qurmalarına imkan verir.
Abunəçilərə həmçinin canlı yayımlar zamanı istifadə edə biləcəkləri unikal etiketlər və adlarının yanındakı nişanlar da veriləcək. Məzmun yaradıcıları öz icmalarına özəl olaraq nəzərdə tutulmuş üstünlüklər təqdim etmək imkanı da əldə edəcəklər. Bu yeni xüsusiyyət, TikTok-un Patreon və digər məzmun platformaları ilə rəqabət aparmaq cəhdinin bir hissəsi olaraq önə çıxır.
TikTok-un yeni abunəlik xüsusiyyəti məzmun yaradıcılarına əlavə gəlir imkanları təklif edərək onların platformada daha davamlı qalmasını təmin edir. Bu, məzmun yaradıcılarının daha çox orijinal məzmun yaratmalarına və abunəçiləri ilə daha güclü bağ qurmalarına kömək edir. Həmçinin TikTok-un digər platformalarla rəqabət aparmasına və istifadəçi təcrübəsini zənginləşdirməsinə imkan yaradır. Abunəlik modeli məzmun istehsalını təşviq edərək platformanın ümumi inkişafına töhfə verir.
