TikTok mesajlaşma bölməsinə yeni imkanlar əlavə etməklə öz platformasının funksionallığını genişləndirir. Belə ki, bundan sonra istifadəçilər TikTok-un mesajlaşma bölməsində 32 nəfərdən təşkil edilmiş qrup çatlarını yarada bilərlər. Yaradılmış qrup çatında real zaman ərzində videolar paylaşmaq və onlara rəy bildirmək mümkündür. Lakin TikTok daxilindəki qrup çatları ilə bağlı bir nüans var.
Belə ki, platformanın 13 yaşdan 15 yaşına kimi olan istifadəçiləri üçün bu imkan aktiv deyil. 16-17 yaşlı istifadəçilər üçün isə qrup çatlarında bəzi məhdudiyyətlər nəzərdə tutulub. Məsələn yeniyetmə istifadəçi qrup çatlarına yalnız o halda qoşula bilər ki, həmin çatlarda onun minimum 1 nəfər ortaq dostu olsun. Bundan əlavə olaraq TikTok özəl mesajlarda stikerlərdən istifadə imkanını da reallaşdırıb. İstifadəçilər bu halda artıq hazır stikerlərdən istifadə edə və ya öz stikerlərini yaradaraq platformaya yükləyə bilərlər.
