PAŞA Bank POS-terminallarında SİMA Pay ilə biometrik ödənişlər aktivləşdirilib
PAŞA Bank POS-terminal üzərindən üz tanıma ilə ödəniş qəbulunu pilot rejimdə istifadəyə verib.
SİMA Pay biometrik ödəniş həlli PAŞA Bank POS-terminallarına inteqrasiya olunub. Yeni funksionallıq müştərilərə fiziki kart, telefon və ya nağd vəsaitdən istifadə etmədən üz tanıma vasitəsilə ödəniş etməyə imkan verir.
Xidmət hazırda pilot mərhələdədir və yalnız PAŞA Bank kart sahibləri üçün əlçatandır. İlkin mərhələdə biometrik ödəniş “City Mall”da yerləşən “Bravo” supermarketində aktivdir.
Bu inteqrasiya POS-terminal infrastrukturunda biometrik identifikasiya əsasında ödəniş qəbulunun tətbiqi baxımından yerli bazar üçün mühüm yeniliklərdən biri hesab oluna bilər. Həll ödəniş prosesinin sadələşdirilməsi, istifadəçi təcrübəsinin sürətləndirilməsi və kartdan fiziki istifadə ehtiyacının azaldılması baxımından əhəmiyyət daşıyır.
Bankın məlumatına görə, xidmətin yaxın müddətdə digər ödəniş məntəqələrində də istifadəyə verilməsi planlaşdırılır.
