PAŞA Bank və Div Academy birgə əməkdaşlıq çərçivəsində süni intellekt sahəsində yeni təlim proqramı — “AI for Good” layihəsinə qeydiyyatı başlayıb. Proqram valideynini itirmiş, 18–23 yaş arası gənclərin rəqəmsal bacarıqlara çıxışını artırmağı və onların əmək bazarına inteqrasiyasını dəstəkləməyi məqsəd qoyur.
Təlim tam ödənişsizdir və bütün xərclər layihə tərəfdaşları tərəfindən qarşılanır.
Üç ay davam edəcək proqram çərçivəsində iştirakçılar:
- süni intellektin əsasları və istifadə sahələri,
- no-code texnologiyaları və onların biznes proseslərində tətbiqi,
- rəqəmsal bacarıqların inkişafına yönəlmiş praktiki yanaşmalar
üzrə biliklər əldə edəcəklər.
Təlim prosesi mentorluq görüşləri, sahə mütəxəssisləri ilə interaktiv sessiyalar və real layihələr üzərində çalışma imkanları ilə tamamlanacaq.
Layihə PAŞA Bankın sosial məsuliyyət istiqamətində həyata keçirdiyi fəaliyyətlərə uyğundur və gənclərin rəqəmsal savadlılığının artırılması, eləcə də gələcək peşə seçimlərinə dəstək göstərilməsi məqsədini daşıyır. Bank bildirir ki, gənclərin inkişafını və təhsil imkanlarının genişləndirilməsini növbəti illərdə də prioritet istiqamət kimi davam etdirməyi planlaşdırır.
