Malta hökuməti və OpenAI arasında əldə olunan razılaşmaya əsasən, ölkənin bütün vətəndaşları ChatGPT Plus xidmətindən bir il müddətində pulsuz faydalana biləcək. Bu təşəbbüs süni intellekt sahəsində savadlılığın artırılması məqsədi daşıyır. Layihə çərçivəsində Malta sakinləri dövlət tərəfindən təsdiqlənmiş süni intellekt təlim kursunu tamamladıqdan sonra süni intellekt texnologiyalarından gündəlik həyatda daha səmərəli istifadə edə biləcəklər.
Dünyada ilk dövlət səviyyəsində AI tərəfdaşlığı
Bu addım dünyada ilk dəfədir ki, bir ölkə bütün vətəndaşlarına pullu AI xidmətini pulsuz təqdim edir. OpenAI şirkəti bu tərəfdaşlığı süni intellektin inkişafı və yayılması baxımından mühüm bir mərhələ kimi qiymətləndirir. Malta hökuməti isə bu layihənin ölkədə rəqəmsal transformasiyanı sürətləndirəcəyini və gənclər arasında AI bacarıqlarının artmasına səbəb olacağını vurğulayır.
Xatırladaq ki, ChatGPT Plus abunə xidməti aylıq 20 dollar dəyərindədir və istifadəçilərə qabaqcıl AI modellərinə, daha sürətli cavab müddətinə və prioritet girişə imkan verir. Malta hökuməti bu xərci tam şəkildə öz üzərinə götürür.
Mənbə: banker.az
