Azərbaycan Mərkəzi Bankının təşəbbüsü ilə formalaşdırılan Açıq Bankçılıq ekosisteminə ilk dəfə olaraq iki elektron pul təşkilatı – “Mpay” və “Qoldenpey” (Pulz) inteqrasiya edilib.
Bu inteqrasiya maliyyə xidmətlərinin əlçatanlığını artırır, istifadəçilərə müxtəlif hesabları vahid platforma üzərindən idarə etmək imkanı yaradır və məlumatlara təhlükəsiz, effektiv çıxışı təmin edir.
Açıq Bankçılıq mühiti elektron pul təşkilatları üçün innovativ məhsul və xidmətlərin inkişafını təşviq edir, bazar iştirakçıları arasında əməkdaşlığı gücləndirir və rəqabət mühitini daha da genişləndirir.
Mərkəzi Bankdan bildirilib ki, bu təşəbbüs maliyyə inklüzivliyinin artırılmasına, şəffaflığın gücləndirilməsinə və ölkədə rəqəmsal iqtisadiyyatın inkişafına mühüm töhfə verir.
Açıq Bankçılıq ekosisteminin genişləndirilməsi istiqamətində işlər davam etdirilir. Növbəti mərhələlərdə digər iştirakçıların da sistemə qoşulması nəzərdə tutulur.
