Texnologiya dünyasında yeni dövr başlayır. Google, illərdir istifadəçilərin həyatının bir hissəsinə çevrilən Google Assistant xidmətini Android cihazlardan tamamilə kaldırmaq qərarı alıb. 4 sentyabr tarixindən etibarən Google Assistant əvəzinə şirkətin süni intellekt əsaslı yeni köməkçisi Gemini aktiv olacaq. Bu dəyişiklik, mobil əməliyyat sistemlərində köməkçi texnologiyaların gələcəyini yenidən müəyyənləşdirə bilər.
Google Assistant 2016-cı ildə istifadəyə verilmişdi. O zamandan bəri milyonlarla istifadəçi bu köməkçi vasitəsilə zənglər edib, mesajlar yazıb, smart cihazları idarə edib. Lakin son illərdə böyük dil modellərinin inkişafı ilə köhnə tipli assistentlər geridə qaldı. Google, Gemini adlı yeni nəsil süni intellekt modelini artıq bir çox xidmətinə inteqrasiya edib və növbəti addım olaraq Assistant-ı tamamilə əvəz etmək qərarına gəlib.
Gemini ilə yeni imkanlar
Gemini, yalnız səsli əmrləri yerinə yetirmir, həmçinin konteksti dərk edərək daha mürəkkəb sorğuları cavablandıra bilir. Məsələn, istifadəçi kameranı açıb ətrafı göstərdikdə, Gemini həmin görüntünü analiz edib məlumat verə bilir. Bu, Google Assistant-ın sadə əmrlərindən qat-qat irəlidir. Şirkət, Gemini-nin istifadəçilərin gündəlik fəaliyyətlərini daha təbii şəkildə asanlaşdıracağını bildirir.
Google, bu keçidi hamar etmək üçün istifadəçilərə Gemini-yə uyğunlaşmaq üçün vaxt verəcək. Android cihazlarda Google Assistant proqramı tamamilə silinəcək, lakin Google proqramı daxilində Gemini-ni aktivləşdirmək mümkün olacaq. İstifadəçilərin köhnə əmr tarixçəsi və parametrlərinin Gemini-yə köçürüləcəyi açıqlanıb. Bundan əlavə, smart ev cihazları ilə əlaqə də Gemini tərəfindən idarə olunacaq.
Bu addım, Google-ın süni intellekt strategiyasının bir parçasıdır. Şirkət, öz ekosistemində bütün köhnə texnologiyaları yeni AI modelləri ilə əvəz edərək vahid istifadəçi təcrübəsi yaratmaq istəyir. Rəqiblər artıq oxşar istiqamətdə addımlar atır, lakin Google-ın bu miqyasda köçürmə həyata keçirməsi böyük diqqət çəkir. İstifadəçilərin böyük hissəsinin Gemini-yə keçidlə yeni funksiyaları mənimsəməsi zaman tələb edə bilər. Ancaq Google-ın iddiasına görə, Gemini istifadəçilərin ehtiyaclarını daha sürətli və dəqiq qarşılayacaq.
Mənbə: shiftdelete.net
