Qida texnologiyaları sahəsində fəaliyyət göstərən Clopos Qazaxıstan bazarında yeni inteqrasiyanı tamamladığını açıqlayıb.
Məlumat şirkətin həmtəsisçisi və əməliyyatlar üzrə direktoru (COO) Murad Həsənov tərəfindən paylaşılıb. Onun sözlərinə görə, artıq ölkədə fəaliyyət göstərən Chocofood platforması Clopos POS sisteminə inteqrasiya olunub.
Qeyd edilir ki, bu yenilik sayəsində restoranlar Wolt, Yango və Chocofood üzərindən gələn sifarişləri vahid interfeys – Clopos ekranı vasitəsilə idarə edə bilirlər. Bu isə sifarişlərin əl ilə daxil edilməsini aradan qaldırır, mümkün səhvləri azaldır və əməliyyat proseslərini daha da sürətləndirir.
Şirkətin açıqlamasına əsasən, Clopos hazırda 4 bazarda fəaliyyət göstərir və 9-dan çox çatdırılma platforması ilə inteqrasiya olunub. Bunlar arasında Uzum Tezkor, Bolt Food, Yemeksepeti, Trendyol Go, Getir Yemek, Wolt, Yango, Migros və Uber Eats kimi platformalar yer alır.
Clopos Qazaxıstanı strateji bazarlardan biri kimi qiymətləndirir və yerli ekosistemin tələblərinə uyğun texnoloji həllər üzərində işləməyə davam etdiyini bildirir.
